Adding Gold Foil~燙金

早前Heidi Swapp出左部燙金機, 一直都心思思想買, 不過屋企真係冇乜位, 加上實用性好似唔高, 所以一直都係考慮中。

最近有朋友send左段video俾我, 原來Jennifer McGuire有教過點樣做燙金, 唔使用Minc都做到, 所以就訂左Foil同膠水試下~~



片段教左5種方法, 我最想試既就係用呢個膠水做燙金, 所以第一時間就試呢個~~~
試完之後真係完全體會到台上三分鐘, 台下十年功~見Jennifer做好似好容易, 自己做過就知唔容易。

上面係第一次, 完全失敗。下面第二次, 好少少

呢個第4次, 用左第二個印

試左7、8次之後, 終於有D似樣~~~

除左用呢款膠水, 段片仲介紹左幾種方法, 大家可以自己試下~~

https://www.youtube.com/watch?v=g2ABXldEEv0

Mojo Monday

外國有好多Card Challenge, 桃子一向都好少參與, 因為冇乜時間, 我比較喜歡Mojo既Monday Challenge, 因為多數只係跟Sketch做一張卡就可以, 係茫無頭緒既時候, 呢D Sketch的確好有用, 所以今次參考左Mojo Sketch 做左張卡俾朋友, 順便參加Challenge~~~

泰國學藝 Day 4 & 5

再唔寫就真係唔記得.......

今日我地本來打算去S & P 食早餐，點知原來Central Plaza要10:00 am先開，我地黎到既時候已經9:45， 打算等15分鐘。又突然醒起S&P既早餐係7:30-10:00供應........結果我地去左Tesco Lotus food court 食魚蛋粉。

即係代表我地又要行20分鐘去阿sir度，所以離開之前買左杯冰凍飲品陪我地~~~~

每次行過都會見到呢間鬼屋咁既建築物，阿Sir話呢度以前係一個好受歡迎既Theme Park，後來結束左就變成咁，依家成為左高卡車場中間既一個孤島。

今日係最後一日上堂, 會學Armenian Style Binding，我同朋友都係學同一款, 進度可以快D, 我地就有時間玩埋紙染 。

呢款book bind 又同之前果兩款有少少唔同, 會有3條 main cord, 先圍繞3條main cord 做binding 再利用之前打左既洞黎做pattern。

由於冇用Sewing Frame都有D難度, 絛cord會移位, 不過阿Sir話細書冇sewing frame都可以, 但大書就唔得

完成左呢部份既binding, 之後阿Sir就教我地撕紙。原來阿Sir俾我地做book binding既內頁，係佢一張張人手撕既, 工具只需要一把間尺~~~不過都好花時間, 撕既角度同速度都會影響紙邊既texture。

撕完紙就take個lunch break, 補充一下體力~

鮮魷炒米賣相一般, 不過都好好食 ^^

食完飯阿Sir就拎左D工具黎教我地染紙, 我用咖啡, 朋友就用茶。阿Sir就覺得茶效果好D, 不過茶既染料只可以用一次, 因為再用會唔夠色, 但咖啡就可以留起再用。

浸左D紙之後我地就繼續下半部既book binding, 染紙最少浸20分鐘, 浸左30分鐘之後阿Sir就幫我地收紙。紙與紙之間要再用一張普通影印紙相隔, 吸濕, 再一張張攤出黎風乾。一定唔可以俾太陽曬, 要放係陰涼地方風乾。

左邊係茶染, 右邊係咖啡染, 乾左之後會變淺色

呢個就係最後成果~~~

學藝3日真係好充實~~

今日學埋染紙仲早左一個鐘完, 我地Book左7:00做Spa, 仲有幾個鐘就急急腳離開去阿Sir介紹既Rama 9 Central Plaza行街~~~

點解去果度? 因為果度有一間文具店(我覺得似美術用品舖多D), 一間scrapbook store同一間好大既B2S。

我地去到第一時間搵左間文具店, 見到scrapbook store就係隔壁, 所以入去八下~~~

唔敢影相, 但見到好多靚靚作品, 仲有好多bind好左既notebook. 阿sir話呢度有佢用果款粗線賣, 有PVA glue, 不過幾貴, 佢介紹我地去文具舖買Tot Glue, 話都可以用, 而且平好多。

另外我地覺得阿Sir用既上膠掃幾好用, 所以又掃晒番黎。

仲平過我第一日係B2S買 >.<

買完野但搵唔到果間好大間既B2S, 又差不多夠鐘做SPA, 求其食少少野就算~~

紫色薰衣草味一般, 橙色哈密瓜味唔錯

又食日本野~~

間Spa叫 Unique Spa, 係一個香港女仔開既, 地點都幾隔涉, 不過佢叫左個Therapist黎MRT station接我地。地鐵站行過去大約10分鐘, 似係一個屋苑既地舖, 裝傷陳設都舒服, 而且做緊promotion 我地個package買一送一, 所以好抵~~~不過唔知係咪就番香港人既喜好, 技師好用力下, 我同朋友都覺得痛.....成日覺得泰國按摩唔夠力既可以一試, 唔受力既最好之前講明, 我估佢地唔介意細力D。

做完Spa之後既茶同小食

由於之前只係食左少少野, 我地做完Spa都覺得肚餓~~~~我記起之前網上見過話Big C附近有夜市會8、9點左右先開直到半夜, 所以決定去睇下。

搭車去到Big C個站, 點知.......見到D檔口已經執緊野, 不過唔係開檔, 係收檔~~~

即刻上網search惠皇夜市。原來個夜市只係係我地間酒店隔一條街..........又搭番酒店, 問埋酒店職員, 就直搗夜市~~~

夜市好熱鬧, 當時已經10:30, 但仲有檔口係剛剛先開檔, 馬路兩邊有好多唔同既攤檔, 有賣食物、衫褲、電子產品......真係乜都有。

我地目標係食物~~~

呢D就係我地既戰利品~~

食完就當然係沖涼瞓覺~~~

Day 5

今日係最後一日，我地再去Rama 9 Central 行B2S同食lunch, 終於俾我地係食肆果層搵到, 真係行到唔捨得走。行完再去Big C買少少手信我地就搭的士去機場, 結束我地5日有驚無險既學藝之旅~~~

留左幾日都冇落過大雨, 去機場途中見到烏雲密佈, 去到機場勁大雨~~

回程訂左個芒果糯米飯, yummy~~

好期待下年再過黎學藝!

泰國學藝 Day 3

先補番尋日朋友學果本書既相先~~

唔知大家認唔認得係October Afternoon邊個Collection呢?

第二日上堂, 都係11至5, 今日我地又一早過左Big C食早餐, 之後搭的士過去。

個天好藍~~~

食早飯

係Big C搭的士過去大約20分鐘左右就到, 不過我地都截左兩次的士先有架識去(已經有阿Sir俾既泰文地圖)。

今日我地都係學Polska Lace Binding, 兩個款有少少似。

今日學既比尋日複雜, 所以Cover就由阿Sir代勞, 入面既section阿Sir都已經幫我地預備好, 一開始就可以打洞, 之後就開始縫。

阿Sir既紙好特別, 原來係自己Print既

做完第一、二個步驟, 阿Sir拎左個Sewing Frame出黎, 原來俾我地夾住本書, 做織女

我地真係好俾心機上堂架

今日早少少食飯, 大廚未走, 終於唔使食微波爐食物~~

係縫書期間同阿Sir閒談, 知道泰國買Scrapbook野好貴, 係Rama 9 Central Plaza 有間Scrapbook Store, 叫我地可以去睇下。

我地第一日已經見佢用既紙好特別, 好有Vintage feel, 問佢點整, 阿Sir又好好人話我地知。原來D紙係佢逐頁手撕! 我地都好驚訝, 手撕都咁靚~~~~顏色亦係自己染既, 佢話有Tea Dye同Coffee Dye兩種, 仲話如果有興趣明天可以教我地~~~我地當然唔錯過啦!

奮鬥左一日, 終於完成

落左堂之後我地又去左Central Plaza行, 今日冇再過Lotus, 因為尋日行過下,其實冇咩好行, 反而Central Plaza 多好多野行。

上到樓上見到好多人拎住杯好似好美味既綠茶飲品, 我地一於又去睇下, 原來只要係Line加左間舖做朋友就有買一送一Coupon, 雖然唔識睇泰文, 都即加~~

就係呢間

真係幾好味~又大杯, 買一送一只係十幾蚊港紙一杯

係Central 百貨公司仲俾我地搵到D罕見既Forever Friends產品~

今晚我地想食泰國餐, 所以揀左S&P

又好食又抵食

由於酒店仲有好多生果, 所以今日就冇再試佢地既甜品, 我見有人只係單點甜品, 我估佢地既甜品都應該唔錯, 下次再試。

我地見S&P有早餐食, 於是決定聽日黎試下(可惜最後都係試唔到, 點解?下次話你知)

食完野我地去地下既supermarket買左少少野就番酒店, 今晚仲夜, 番到酒店已經成10:00。

Day 3 完

泰國學藝Day 1 ~ 2

今次去曼谷學手已經恨左好耐，不過我唔可以好瀟灑咁話走就走，始終要照顧屋企.......終於等到個仔放暑假，媽咪可以幫我湊住希希，老公又批准我去，仲要搵到志同道合既朋友一齊去~~~所以就決定去。

我都知暑假會貴, 所以上網搵左一輪平機票同平酒店, 最後決定搭Air Asia, 仲俾我搵到間平酒店, 雖然唔係D咩星級酒店, 冇設施又冇早餐, 但以呢個價錢同地點真係好抵住(唔係市中心, 今次真係好彩唔係住市中心), 真係地鐵站一出就係。

見唔見到綠色果個門口, 就係我地間酒店, 係咪好近呢~~~

我個人幾欣賞呢個叉電位

房間唔算好大, 不過都乾淨企理

我地第一晚搭夜機, 係飛機買左張tourist sim有7日無限上網1.5GB, 一落機已經收到好多What's app同FB message叫我地報平安, 原來係我地搭緊飛機既時候曼谷四面佛發生爆炸, 死者當中仲有兩個香港人, 難怪屋企人咁擔心。

之後仲陸續有消息話呢次襲擊對象係遊客, 又公佈左十幾個高危地方, 所以果幾日我地都避開晒呢D地區, 只係游走於酒店附近同上課地點之間, 仲時時留意新聞同向屋企人報平安。

其實我地活動範圍係本地人多, 真係唔覺有太大影響, 我地都跟隨其他人一齊搭地鐵番工番學, 不過我地當然會事事小心。

第一晚番到酒店我地都冇再出去, 好彩帶左兩個杯麵, 食完杯麵就瞓。

第二日我地8:30左右就起左身, 因為要出去食早餐同埋去超市行下睇下有冇野要買。

我地住Huai Khwang MRT station, 搭一個站去Thailand Cultural Centre就有間好大既Big C extra, 仲要開8:00-24:00, 真係好方便。

Big C 入面有Food Court 呢碗粉承惠45Baht

喜歡食榴槤既有口福了

好靚既火龍果, 好後悔當日冇買....

有我喜愛既紅毛丹

我地約左阿sir 11:00上堂, 因為第一日唔多熟路所以我地10:00左右就出發。我地搭MRT去到Phahon Yothin Station, 阿sir有建議我地搭電單車Taxi, 話4分鐘左右到, 不過我地都係驚驚地, 又怕的士唔去, 見地圖好似都唔係好遠, 所以就試下行過去。我地係D巷仔中間左穿右插, 發覺呢區真係好local, 有好多小販擺賣, 當我地越近上堂既地方人流就越少, 已經身處住宅區, 除左住宅, 仲有幾間學校添。

行左20分鐘左右就到左上堂既Cafe~~

就係呢度~~~冇錯, 係冇冷氣既, 8月既曼谷, 大家可以想像有幾咁熱~~~

黎之前朋友已經叫我有心理準備, 所以我都預左辛苦, 仲要3日full day~~不過上完3日之後又發覺其實都冇想像中咁辛苦, 可能做手作個人真係relax D。

呢度就係我地上3日堂既地方

我地黎之前並未confirm想學咩款, 因為想睇下實物先, 有時睇相都唔係太清楚。阿sir既studio其實係阿猶他亞(大城), 所以呢度既sample 唔多, 阿sir仲建議我地學唔同款番到去再互相學習。最後我地揀左一款相同, 果款就最後一日學。

第一日, 我揀左本Polska Binding, 朋友就學左2 Needle Coptic。

呢日阿sir由講解紙紋理同摺紙教起~~~

一共21張紙, 有一張用黎做template

再教封面製作

再教打洞

最後就係縫~~~

呢本比起普通2 needle Coptic多少少技巧, 我最鍾意中間個pattern~~~阿sir話呢3個色好lovely。

第一日落堂睇下個鐘真係已經5:00, 中間我地只係去左附近既便利店食叮叮飯~~~因為我地食飯果時太晏, 個廚師走左~~~

落左堂之後阿Sir帶我地行去地鐵站, 佢話可以唔使行中間既小路, 可以行大路。原來係地鐵站附近有間Tesco Lotus 同有個Central Plaza。我地每日落堂都係果度行街食飯, 果度其實都好多野行又多野食, 根本唔需要去市中心同人迫。

Central Plaza basement有間好大既B2S, 我地仲買左好多心水野~~~

當晚我地就係Tesco Lotus 間Fuji同Swensens 野, 順手買D生果番酒店, 反到去已經九點幾了。

榴槤主題, 不過我地冇食~~~

Day 2 完~~~