原來已經超過半年冇出過blog, 真係懶.....之前去濟洲島自駕其實都應該寫番篇, 起碼留底有用資料, 但最後都冇寫......所以決定今次要出番篇, 俾朋友作為參考。
老爺一直想坐郵輪, 我呢個廿四新抱仔梗係要做下功課。最心水航程係基隆上船去日本, 可惜時間夾唔啱, 唯有放棄。最後敲定歐洲地中海, 點知老爺表示冇興趣, 所以又唔得.......
得知有隻新船仲要係以香港作母港, 一於決定試下3D2N航程。
星夢其實都係麗星郵輪, 但呢條line係走high end路線, 所以同其他麗星郵輪應該有所不同。一艘15萬噸既新郵輪, 都會有少少期望, 但經過呢個3D2N航程, 暫時唔考慮推薦大家book。
首先讚下艘船先~~~
1)新郵輪, 設計新穎, 光線充足, 唔會有暗沉沉既感覺
2)工作人員大都友善, 有問題都會盡力幫忙
3) check-in很快, 只排了20mins左右(但check-in完等安檢上船先係耐性既考驗)
4)落船過程很順暢, 不用大排長龍, 與上船速度有鮮明對比
5) 戶外活動設施非常好, 有6條滑水梯、兒童嬉水區、繩索場、攀岩牆、迷你高爾夫......如果全部都玩到3D2N係唔多夠, 可惜我地無緣享用。
6)以一艘截客量3400人既船黎講, 上船後都一個地方出現人頭湧湧既感覺(但我唔知呢個航程既實際截客量)
7)郵輪上wifi要收費($128-$228)所以要同親朋戚友溝通有D難度, 郵輪個apps就有亙send信息功能, 呢個真係唔錯, 自由活動之後要集合用呢個比較方便, 呢個用郵輪wifi都唔需要額外收費。
8)郵輪個apps可以Book show唔一定先己限時限刻去box office, 好方便。而且有晒全日咩時段有咩活動, 唔錯。
9)張床好舒服
 |
| 隻船的確幾靚 |
 |
| check-in櫃台很多, 雖然很多人排隊, 但很快便完成 |
 |
| 如果你book套房當然待遇更好 |
 |
| 終於上船大人細路都好興奮 |
 |
| 經過長長走廊...... |
 |
| 終於番到房 |
 |
| 呢間就係我地間房 |
 |
| 歐美郵輪好多因為環保已經冇提供呢D用完即棄用品, 我地都自己帶左所以冇用 |
 |
| 我幾鍾意呢個control panel 簡單易明 |
 |
| 因為4個人, 所以開左梳化床同吊床 |
 |
| 每人一枝水(整個航程)唔夠都唔怕, 因為賭場有枝裝水拎。 |
 |
| 送既紅酒一枝 |
 |
| 我地既露台 |
 |
| 由露台向後望 |
 |
| 甲板泳池, 全程有網, 估計係天氣唔好所以冇開 |
 |
| 呢個係親子滑水梯, 朝早開左一小時就因為天氣關係close, 下晝一開始其實冇落雨, 見有人想玩,但又話有D野要維修冇得玩, 要3:30先再開, 但之後都一直落雨了。 |
 |
| 另外既滑水梯 |
 |
| 小朋友都可以玩既繩索場 |
 |
| 迷你高爾夫, 上面係大人玩既繩索場 |
 |
| 夜光保齡球場, HK$60/局 |
 |
| 戶外屏幕 |
 |
| 好多地方都有消毒液, 呢個唔錯 |
 |
| Deck Plan |
 |
| 亞洲船似乎睹既地位都好重要, 歐美船既中庭多數係餐廳, 呢度中庭有兩層賭廳 |
 |
| 人地夾公仔, 我地夾錢~~~ |
有好多高檔免稅店, 都唔係我杯茶
 |
| 藝術品~~ 可以買走, 不過藝術呢D野, 我C9仔識條鐵咩 |
 |
| 臨近聖誕, 有少少裝飾 |
讚完艘船, 當然要寫下點解唔推薦呢個3D2N航程
1)時間短
我承認呢個係自己既問題, book既時間唔諗清楚呢個時間有咩問題就走去book, 但真係好希望船公司會再檢視下時間安排。呢個美其名3D2N既航程, 係船上既時間只有34~36小時, 連48小時都冇, 剛模熟隻船已經要落船。第一日上到船已經夜晚9點幾, 第三日早上8點已經要落船, 係橫跨3D2N既, 但玩既時間只得1日full day。如果你第一日想上船食個晚餐, 第三日想落船前食個早餐就真係要與時間競賽。
2)安排混亂
房間:
我地book左一間露台房(普通果款) 4人, 一上船大家又餓又累好想番房放低野先, 一開房, 有人既! 我地同房入面既人都同時嚇左一跳。大家就拎門卡出黎睇下有冇搞錯, 又冇喎.........於是問行過既員工, 佢地搵人幫我地, 有一位應該高級少少既crew拎左份房客名單同我地對, 真係我地個名, 之後有個外籍crew黎到就話因為呢間係相連房換唔到俾已經入左去既人(因為人地book相連房)所以唯有我地轉, 又要跟個crew去前台搞一輪先番到房, 番到去已經9:45pm, 仲未食dinner......
餐廳:
第二日我地lunch去左雲頂宮(8/F船尾), 呢間唔係自助餐廳, 係有人serve同依套餐既, 唔需額外收費餐廳, 所以早上走去問下要唔要book, 佢話唔使, 咁就冇book。午餐12:00開始, 我地12:10到餐廳已經話冇位, 話可以幫我地留枱先, 叫我地1:30番黎, 都OK, 因為我地都好晏先食完早餐。1:30去到, 見好多人排隊, 都有秩序既, 但有留位同冇留位既都有排, 排排下就話冇小票(留位票)就冇位, 要有小票先有位, 當然又引黎小小鼓譟。入到去我坐底我以為會full house, 食左一陣, 出面已經冇人龍, 但仍然有好多吉位, 唔知係有人留左位冇到定餐廳休息時間(14:00休息)差不多到, 所以唔入人, 但俾人感覺安排有D混亂。
餐具:
真係估唔到呢個都要寫.......主要係中餐廳出事。早上係星夢軒(7/F船尾)食早餐, 比較多少少中式野食, 但餐具得刀同叉, 筷子要自己去湯麵section拎, 匙更要問先有, 但D待應好似都比較忙, 因為要幫人客加茶水, 結果我要用筷子食乳酪......午餐係雲頂宮食, 坐低左, 食物上列黎, 未有餐具, 連杯同碗都唔齊, 餐巾亦要主動要求先有。
表演:
第一晚我地已經錯過左佢地既重點節目-中國達人秀, 見第二日有show睇, 當然要去book。表演3:00開始, 我地準時到達, 但等了又等, 過左15分鐘都未有得睇, 因為後台有技術故障, 25分鐘左右終於有演藝人出黎, 以為就快開場, 原來係分散大家注意力, 等大家猜咁悶, 同兩位藝人影下相, 等左35之後個show終於開始, 好彩個show都幾好睇, 唔係真係浪費時間。
3)食物質素不似預期
之前youtube睇過人客實評, 對食物期望都唔高, 但比預期更差。自助餐普通就唔再多講, 但終始終係亞洲船, 對中餐都有少少期盼, 但雲頂宮個lunch簡直係難食。頭盤沙拉海鮮坊, 係雪藏蝦仁同帶子就咁加D沙律醬, 冇其他調味, 大家可以想像下幾"鮮味"。主菜:三杯炒雞球,雪藏雞冇味而且調味亦不特別出色; 南乳炸花肉, 乾到可以當界刀用; 沙拉脆皮魚塊, 一D都唔脆; 花菇扒西蘭花, 雖然果D並唔係花菇, 但呢個係最正常。湯係唔錯, 甜品同生果都係正常野。我唔係一個浪費食物既人, 但呢餐我地只清左個湯同菜, 其他果三個主菜真係無能為力。
麗都餐廳(16/F船尾)的早餐
星夢軒的早餐食物跟麗都差不多, 只是加多點中式原素及有即煮食物
 |
| egg station |
 |
| 即煮湯麵 |
雲頂宮既lunch
3) 24小時餐廳需要付費:
郵輪24小時有野食, 呢個應該係常理, 但估唔到唔係24小時有不收費食物供應。所以點解我地第一晚咁趕去依野, 因為最夜既環球烤吧收23:30, 如果唔食, 過左就要去付費24小時餐廳食。雖然我都冇期望會有24小自助餐供應, 但半夜都應該有D免費輕食但如麵包、三文治、蛋糕咁。第二日14:30-17:30呢段期間都係冇免費食物提供, 所以要食就趁早。
4)kids room 玩樂設施一般:
如果天氣好, 又有得玩水, 個kids room對我黎講作用唔太, 但因為天氣唔好, 已經冇得出戶外玩, kids room相對變得重要。因為大人唔可以入kids room所以我只能靠官方圖片同目測, 見到kids room只有少量玩具, 有D梳化仔, 電視咁, 係冇波波池滑梯呢類設施, 加上我小朋友唔識用普通話同英語溝通(對唔住我係一個懶港媽, 冇訓練好個仔兩文三語), 搞到佢好唔開心。話說手工玩節我要放低佢一小時, 我50分鐘左右黎見佢呆坐遠處一角, 一見到我連滾帶爬喊得好厲害話要走(我想信佢忍左好耐), 果刻我有少少後悔俾佢留係度。
5)員工溝通能力:
之前都講過我地入房果度出現問題, 有個外籍crew黎了解, 個外籍crew一黎問咩事同埋邊個可以講英文, 在場2-3位亞洲面孔員工呆左下, 結果係我講俾佢知咩事,再翻譯俾其他員工知佢講咩.......我唔係想批評某D員工既工作表現, 因為呢件事佢地都好盡力幫我地, 但語文能力似乎同我仔一樣要再加強下。
6)疑似許志安演唱消失事件
話說第二日個apps上見到夜晚8:15有一個「許誌安演唱」, 我地見到個名同大家都識果個唔同, 以為係一D演藝人模仿既演唱會(歐美既船都幾流行呢類節目), 而且一直都冇地點, 所以冇理會。點知番到屋企睇雜誌見到係真‧許志安演唱~~~~~~但唔知係取消左定點, 知道果一刻都有少少望, 好彩唔係睇左呢個宣傳先上船, 否則一定更加失望。
 |
| apps上一直都有許誌安演唱呢個活動, 但只聞樓梯響 |
 |
| 番黎先發現原來真係有許志安睇, 有D失望 |
總結:
天氣不似預期加上可能我地黑仔, 冇戶外活動玩已經大為失色(戶外活動只開左第二日10:00am-11:00am換好晒裝備正準備上繩索場都要除番落黎, 真係好掃興), 再加上整個航程有好多安排得唔太好(有好多進步空間), 所以唔會建議朋友參加3D2N呢個航程, 起碼時間加長先會再考慮。
星期日放假仲早過平時起身既感覺一D都唔好, 好似好慘要被人趕落船咁...........
因為隻船戶外活動設施真係唔錯, 如果想體驗呢隻船應該參加6D5N東南亞航程會比較好, 好似comment都唔錯, 希望佢之後既軟件可以提升一下。
桃子意見大家可以作參考, 唔係我既體驗就係絕對, 大家想上船體驗一下我都唔反對, 呢度只係我個人經歷, 有唔客觀地方多多包涵, 我都希望你既體驗比我更好, 我亦期待下次既郵輪之旅~~
